Este fluxo enerxético enorme (1,5.10 billóns TWh anuais) foi subestimado durante moito tempo, ata que nos anos 70, coa primeira grave crise petrolífera, saltaron os sinais de alarma e comezouse a pensar seriamente nas posibles fontes enerxéticas alternativas aos perecedoiros combustibles fósiles:
Ademais, a ese previsible esgotamento das fontes convencionais, haille que sumar o problema da dependencia enerxética, que en Europa chegará ao 70% nos próximos 20 anos. Isto está levando aos países da Unión Europea a pensar nun “Tratado Europeo das Enerxías Renovables”.
O Libro Branco das Enerxías Renovables é un documento elaborado pola Comisión Europea que traza unha estratexia e un plan de acción para que os estados membros fomenten o uso das fontes de enerxía renovables. Pretende que o consumo de enerxías renovables na UE acade no 2010 o 12% do total fronte ao 6% actual. Este documento centra as súas prioridades en conseguir unha maior explotación do potencial dispoñible, unha mellor contribución á redución do CO2, unha redución da dependencia enerxética e o desenvolvemento das industrias nacionais para crear emprego.
